السلامة المرورية / الناس الي بتسوق الاوتوماتيك لازم تعرف حجات ضرورية

مصر / كتب إبراهيم كيلاني

#توعيه
الناس اللى بتسوق الاوتوماتيك لازم تعرف شوية حاجات
الكلام ده للناس اللى مش عارفه

أول حاجة الرموز الأساسية اللى بنشوفها فى الفتيس

الـ P يعنى Park : بتوقف بيه العربية
الـ R يعنى Reverse : بيخلى العربية ترجع وراء (مارشدير)
الـ N يعنى Neutral : وضع التموير ( الموور )
الـ D يعنى Drive : وضع السواقة او المشى بالعربية

١- لازم تبقى عارف أن العربية فى الاوتو مش هتدور
على الـ D ولا هتدور على الـ R لإن بإختصار ال D و ال R بيفصلوا كهربة عن المارش تماما و مش هيخلى العربية تدور نهائى

٢- و أنت واقف فى الإشارة هات الـ N اللى هو المور عشان تريح تروس الفتيس و متلفش على الفاضى و تبقى العربية عايزة تطلع و انت ماسكها فرامل

٣- و أنت بتجيب الـ D أو الـ R خلى رجلك على الفرامل لانك لو جبت حاجة من غير فرامل هتلاقى العربية مشيت من غير ما تدوس بنزين لان التروس اتحركت و حركت العربية معاها .

٤- إوعى تنقل من نقلة لنقلة و العربية ماشية حتى لو ماشية على سرعة 5 كم يعنى مينفعش مثلاً و انت بتطلع من ركنة و جايب ال D و العربية لسه بالراحة أوي اهى و بتطلع من الركنة تروح جايب ال R عشان تعدل نفسك و تطلع
لا انت كده بتدمر تروس الفتيس مع الوقت لازم العربية تقف
و تروح جاى ناقل من الـ D و الـ R و العكس

٥- نيجى بقى للأوضاع التانية هى الـ L و الـ 2 و الـ 3

الـ L هو الغيار الاولانى و ده الناس بتستخدمه فى المطالع الجامدة لإنه بيدى عزم شديد على سرعة قليلة بس خد بالك مينفعش تكون ماشى 60 ولا 80 و تروح جايب الـ L هتكسر الفتيس كده اخرك 30 بالكتير تجيب الـ L عليها

الـ 2 الغيار التانى والأول مع بعض بيسمح للعربية تننقل بينهم

الـ 3 الغيار الأول والتانى والتالت فقط مش بتنقل للرابع

ممكن عادى و انت ماشى على الـ L او ال 2 او ال 3 تجيب ال D مرة واحدة عادي لانه شغال على جميع النقلات في أي وقت عادي.

٦- لو عايز تحافظ على فتيس عربيتك و انت بتركن او بتقف بالعربية إوعى تجيب ال P مرة واحدة و متشدش الهاند
او تجيب ال P و تشد الهاند بعدها

* الوقفة الصح بالفتيس الأوتوماتيك :

تدوس فرامل و تجيب الـ N و ترفع الهاند و تجيب ال P
الخطوات من الشمال لليمين

N – > Hand Break – > P

بكده حملت على الهاند بريك و اللى وظيفتها توقف العربية
لكن لما بتجيب ال P و بعد كده الهاند انت كدة حملت العربية كلها بالمكنة بكله على ترس الفتيس و مع الوقت بيتاكل و يتكسر و ترجع تقول ليه انا كنت محافظ على العربية.
وربنا يسترها معانا جميعا.